Paneldi sessııa qonaqtary retinde «Habar» AQ agenttiginiń dırektory Jaına Slambek, jýrnalıst Ashat Sadyrbaı, Senat depýtaty Dana Nurjigit, QQDI basqarma tóraǵasynyń keńesshisi Álibek Qısybaı jáne t.b spıkerler qatysty. Al moderatorlyq mindetti Moldııar Ergebekov júrgizdi.
Jýrnalıstıkanyń ózekti máseleleri talqylanǵan konferensııada jýrnalıst etıkasy, jańa tehnologııanyń damýymen búgingi kúnniń talaby, «data jýrnalıstıka» jáne jýrnalısterge arnalǵan zań jobasy talqylandy.
Máselen, belgili medıa menedjer, respýblıkalyq «Habar» arnasynyń dırektory Jaına Slambek medıa salasynyń ózekti ózgeristeri jaıly aıtty.
«Dáýirge sáıkes jýrnalıstıka ózgergenimen, áli de basty talap - qundylyqtyń bolýy. Bastysy «Memleket - adam úshin» qaǵıdasy saqtalýy kerek. Jýrnalıstiń quzyrettiligi - árqashan adam bolyp qalý, adamı qundylyqtardy joǵary qoıý», dedi ol.
Al Qazaqstandyq qoǵamdyq damý ınstıtýty basqarma tóraǵasynyń keńesshisi Álibek Qısybaıdyń aıtýynsha, data jýrnalıstıkany damytý kerek. Bul rette sıfrlarmen, derektermen jumys isteı alatyn jýrnalıster - qazirgi kúnniń talaby.
«Jýrnalıstiń qyzmeti bul aqparatty usyný ǵana emes qoı, óńdep ózegin berý. Ol úshin aqparattarmen jumys isteı alýy kerek. Data jýrnalıstıka salasy - ártúrli mamandardyń toǵysqan ortasy da bolýy múmkin: áleýmettanýshy ǵalymdar, statıster taǵy basqalary qatysa alady. Mine, qazirgi transformasııa, bul bir jýrnalıstıka salasynyń sheńberinde emes, jan-jaqty bolyp derekterdi taldaı alý», dedi Álibek Qısybaı.
Sessııa sońynda, senator Dana Nurjigit jýrnalısterdiń kásibı etıkasy jóninde sóz qozǵady, ásirese Parlamentke keletin keıbir sala mamandary talqylanatyn zań jobasy týraly múlde habarsyz jáne daıyndyqsyz kelip jatatynyn aıtty.
Sondaı-aq ol jaqyn arada Parlamentte Jýrnalısterge qatysty zań jobasy qabyldanatynyn atap ótti. Áriptesterin sol zań jobasyn birlesip talqylaýǵa shaqyrdy.
